LAOAG CITY – Naipila iti Kamara de Representantes ti calamity pay para kadagiti trabahador a kasapulan nga ag-report para iti trabaho iti tengga dagiti didigra wenno nakaro a kasasaad ti paniempo.
Inpila ni TRABAHO Party-List Representative Johanne Bautista ti House Bill No. 4435, wenno ti Calamity Pay Law, a mangikagkagumaan a mangimandar iti kanayonan a 30% a calamity premium iti rabaw ti regular pay dagiti empleado ti publiko ken pribado a sektor.
Kinuna ti TRABAHO Party-List a nakagun-od ti bill iti napigsa a public resonance online, partikular kalpasan ti adu a lawas nga agtultuloy ti napigsa a tudo.
Iti sidong ti bill, maibilin koma ti calamity premium pay no ti maysa a lugar ket makasangpet iti aniaman kadagiti sumaganad a kondision:
opisial a deklarasion ti estado ti didigra;
Typhoon Signal No. 3 wenno Red Rainfall Warning;
naipasidong kadagiti imbilin ti gobierno a pannakasuspende ti trabaho; wenno
naideklarar a nakaro a naapektaran kadagiti kalamidad kas iti ginggined ken layus.
Inladawan ni Bautista, a mangidadaulo iti House Committee on Social Services, ti nasao a gakat kas maysa nga aramid ti social justice ken pannakipagrikna kadagiti sakripisio dagiti mangmangged a Pilipino.
