LAOAG CITY – Nagpila ni Palawan 2nd District Representative Jose Chaves Alvarez, Chairperson ti House Committee on Energy, ti House Resolution No. 1249 tapno pormal nga imbestigaren, in aid of legislation, ti System Loss Charges iti singir iti kuryente.
Gagem ti resolusyon a tingitingen no patas, nalawag ken adda ti umdas a proteksyon dagiti consumer kontra iti nasao a mabayadan.
Iti nasao nga inquiry, amwen no kasanu ti panangkontar ti system loss, siguradwen ti transparency, ken kitaen no masalsalwadan ti karbengan ti publiko.
Kalikagom ti komite a denggen ti isyu sakbay a naa-anay a maamendaran wenno ikkaten ti system loss charges iti babaen dagiti nakapenpen a nailungalong a gakat iti kamara de representantes.
Tapno mangngeg ti amin a partido ken malawlawagan ti publiko, plano ti kamara de representantes a paawagan dagiti sektor ken ahensya kas ti Energy Regulatory Commission (ERC), ti ahensya a mangikedkeddeng ken mangreg-regulate kadagiti masingir iti enerhiya kas pay ti Transmission Provider ken Distribution Utilities, karaman dagiti korporasyon ken kooperatiba ti kuryente nga agipatpatulod ti supply kadagiti pagtaengan.
Ado dagiti consumer a maul-ulaw no ania ti makunkuna a system loss charge.
Ti imbestigasyon ket kalpasan ti direktiba ni Presidente Ferdinand Marcos Jr. iti maikalima nga State of the Nation Address (SONA) nga adalen ti naan-anay a pannakaikkat ti system loss charges tapno maipababa ti binolan a baybaydan iti kuryente dagiti Pilipino.
