LAOAG CITY – Ginundawayan ti House Committee on Good Government and Public Accountability ti itatabuno ni Bise Presidente Sara Duterte iti miting ti Quad Comm idi kalman tapno maiyawat ti imbitasion kenkuana.
Maipalagip a dimmar-ay ni Vice Pres. Sara Duterte iti Quad Comm tapno suportaranna ti amana a ni dati a Presidente Rodrigo Duterte nga agserserbi a resource person iti hearing iti isyu ti war on drugs ken extra judicial killings.
Ti committee secretary ti House Blue Ribbon Committee ti nangidanon iti imbitasion iti bise presidente.
Daytoy ket para iti imbestigasyon seknan iti mapapati a di umiso a pannakausar ti confidential funds ti Office of the Vice President ken Department of Education idi isuna pay laeng ti sekretario.
Kabayatanna, manamnama a maangay ti hearing inton Nobiembre 20.
