LAOAG CITY – Indeklarar ti House Committee on Justice a sufficient in grounds ti maikatlo ken maikapat nga impeachment complaints kontra ken ni Vice President Sara Duterte.
Inlawlawag ni Luistro, mangipasimudaag daytoy nga adda ti umdas a pagibasaran wenno rason tapno ituloy ti impeachment proceedings.
Gapu iti daytoy, inanunsio ni Luistro a mangiwayatda ti impeachment hearings inton Marso 25, Abril 14, 22 ken 29.
Mainaig iti daytoy, sakbay nga agbibinnutos, inpetteng ni Luistro a naiget a nasurot ti due process no sadinno a naikkan ti gundaway ti amin nga agpalawag pakairamanan ni Vice President Duterte a naipaayan ti tsansa a sungbatan dagiti alegasion kenkuana.
Kuna ni Luistro, nangipila met ni Vice President Sara ti 15 a panid a Consolidated Verified Answer Ad Cautelam a pirmado ti 16 nga abugadona.
Immalisto ti proseso gapu ta saanen a nagisubmitir dagiti complainants ti reply iti nagbalin a sungbat ni Vice President Sara.
Kunana a daytoy ket kalpasan nga awan met ti nagbalin a direkta a sungbat ni Vice President Sara kadagiti akusasion kontra kenkuana no diket agpapada a general denial laeng.
Dinakamat ni Luistro a saan laeng a binasa no diket inadal pay a naimbag ti amin a nangbukel iti komite dagiti reklamo ken naruay a dokumento a naidatag sakbay a nagdesisionda nga amin dagitoy ket sufficient in form and substance ken ita ket sufficient in grounds.
Ti maikatlo a reklamo ket inpila dagiti padi, madre ken abugado iti panangidaulo ni Father Joel Saballa nga inyendorso ni Rep. Leila de Lima.
Ti maikapat a reklamo ket inpila met ni Atty. Nathaniel Cabrera ken inyendorso da House Deputy Speaker Paolo Ortega V ken Manila Rep. Benny Abante.
