LAOAG CITY – Inkeddeng ti House Committee on Justice dagiti aldaw ti panagdengngeg ti impeachment complaints kontra ken ni Vice President Sara Duterte.
Daytoy ket kalpasan nga indeklarar ti House Justice panel ti maikatlo ken maikapat nga impeachment complaints a “sufficient in grounds.”
Iti panagdengngeg ti komite iti panangidaulo ni Batangas Representative Gerville “Jinky Bitrics” Luistro, kinumpirmaranna nga inaprobaran ti dua a mosion nga awan ti kimmontra a miembro.
Naikeddeng nga inton Marso 25, Abril 14, 22 ken 29, 2026 ti inisyal a pormal a panagdengngeg para iti impeachment complaints ti Bise Presidente.
Immuna iti daytoy, indeklarar ni House Senior Deputy Majority Leader Lorenz Defensor ti Iloilo a ti maikatlo nga impeachment complaints ket sufficient in grounds tapno mangiwayat ti panagdengngeg ti komite.
Inpetteng ni Luistro a nakaawat ti panel manipud iti House plenary nga ituloy ti trabaho uray naka-recess ti Kongreso manipud Marso 21 agingga inton Mayo 3.
Sakupen ti authorization ti panangipatungpal ti protective measures para iti complainant ken dagiti testigo basar iti nakailanad iti Section 8 ti Rules of Procedures in Impeachment Proceedings.
Inawat ti komite ti surat idi Marso 5 manipud ken ni Atty. Chel Diokno nga agkidkiddaw iti pannakaiparuk-at ti subpoena duces tecum para kadagiti maiyannatop a dokumento.
