LAOAG CITY – Nainget a kinondenar ti House Committee on Women and Gender Equality ti misogynistic, sexualized, ken personal a panagatake ken ni House Prosecutor ken San Juan City Representative Ysabel Zamora
Daytoy ket gapu iti estilo ni Zamora a nangsaludsod kadagiti saksi ken dokumento iti impeachment trial mainaig iti panagtagikua iti paltog da Bise Presidente Sara Duterte ken asawana a ni Atty. Manases Carpio.
Maibasar iti palawag ti chairperson ti komite, Laguna Rep. Ann Lourdes Matibag, iti maysa a demokrasia, napateg dagiti pammabalaw kadagiti public officials a rumbeng laeng a nakasentro kadagiti isyu.
Inpetteng ni Matibag a saankoma a maliwayan no dagiti pammabalaw ket naipamaysa iti langa, timek, kinasiasinno, ken ugali ti maysa a tao, nangruna ti babai.
Kinuna ni Matibag a saan koma a tagibassiten ken babalawen ti maysa no kasano ti panagsao ken panangawit ti babai iti bagina, gapu ta ar-aramiden laeng ni Zamora ti pagrebbenganna.
Gapu iti daytoy, awagan ni Matibag dagiti opisial ti publiko, media, supporters dagiti politiko ken amin a pagtalinaeden a nakapokus laeng dagiti isyu kadagiti debate, argumento ken tignay.
