LAOAG CITY – Kinarit ni House Deputy Speaker ken La Union Rep. Paolo Ortega V dagiti kritiko ken opposition lawmakers a mangiparuk-at ti ebidensia nga adda ti kasukat ti panagbutos para iti impeachment ni Vice President Sara Duterte.
Inbatad ni Ortega a nasken a mangiparuk-at ti ebidensia ken inaganan dagiti kongresista a maipagarup a nakaala ti pabor gapu iti panangsuporta iti impeachment kontra iti Bise Presidente.
Inpetteng ni Ortega a no pudno ti istoria ket rumbeng a mangiparuk-at ti sinapataan a salaysay dagiti agiwarwaras iti daytoy ken mangipila ti maiyannatop a kaso.
Inlawlawagna a no awan ti pammaneknek a maiparuk-at mainaig iti nasao nga alegasion ket nasken nga agsardengen dagiti adda iti likudan daytoy iti agtultuloy a pammerperdi iti sibubukel a Kamara de Representantes.
Innayonna a ti ar-aramid laeng nga istoria ti panagpasuksok mainaig iti impeachment ni Vice President Sara ket saan laeng a mangperperdi iti trabaho ti House Committee on Justice no diket iti Kongreso kas maysa a constitutional body.
