LAOAG CITY – Posible a malpas iti katapusan ti Mayo ti impeachment proceedings ti House of Representatives of the Philippines kontra ken ni Vice President Sara Duterte, basar ken ni San Juan Rep. Ysabel Maria Zamora.
Inbatad ni Zamora, Vice Chair ti House Committee on Justice, manamnama a kabaelan ti komite ti 60 session days a palugit sipud idi nai-refer dagiti impeachment complaints isut gapuna a target-da a malpas daytoy iti katapusan ti Mayo.
Idi Pebrero 23, uppat a verified impeachment complaints ti nai-refer iti komite no sadinno a dua ti nagtalinaed nga aktibo idinto nga agtultuloy a matingtingiting no addaan ti “probable cause.”
Kuna ni Zamora a napateg ti timeline gapu ta ipakpakita ti komite a patas ken awan ti kankanunungan ti proseso iti baet ti naiget a pulitika ken public scrutiny.
Innayonna nga uray mamati ti sumagmamano a kongresista nga adda ti pagibasaran ti kaso, dumalan latta daytoy iti panagdengngeg sakbay a makadesision iti probable cause ken posible a rekomendasion iti plenario.
