LAOAG CITY – “No show” manen ni Vice President Sara Duterte iti agtultuloy nga impeachment proceedings ti House Committee on Justice.
Inbatad ni Committee Chairperson Rep. Gerville Luistro, saan nga umdas dagiti rakurak ti Bise Presidente iti ruar ti Kongreso gapu ta ti umno a lugar tapno agpalawag ket iti sango ti komite.
Iti panaglukat ti panagdengngeg, indatag ni Luistro ti ibilangna a “body of evidence” a nakalap manipud kadagiti napalabas a testimonia ken dokumento.
Karaman ditoy ti:
– Rakurak ni Ramil Madriaga a P125 milyon a confidential funds ti Office of the Vice President ket na-disburse iti uneg ti 24 nga oras.
– Dagiti notice of disallowance manipud iti Commission on Audit (COA) mainaig iti P73 milyon idi 2022 ken tallo a disallowances idi 2023 nga umabot iti P375 milyon.
– Testimonia ti National Bureau of Investigation nga adda ti maymaysa a pirma kadagiti resibo ti confidential funds uray agduma ti nagan dagiti immawat.
– Pammaneknek ti Philippine Statistics Authority (PSA) a ti sumagmamano a nagan ti umawat ti pundo ket awan ti rekord iti civil registry.
Inpetteng ni Luistro, saan a saggaysa ti ebidensia no diket adda ti pakainaiganna dagitoy a mangipakpakita ti pattern iti panagusar ti confidential funds.
Kabayatanna, nagatendar iti panagdengngeg ni dati a Senador Antonio Trillanes IV tapno mangisubmitir kadagiti dokumento mainaig iti maipagarup nga unexplained wealth ni Duterte.
Nagatendar pay da Assistant Ombudsman Mico Clavano, Ombudsman Jesus Crispin Remulla ken Bangko Sentral ng Pilipinas Governor Eli Remolona Jr. kas kadagiti resource persons.
Naiget met a kinontra ti kampo ni Duterte ti proseso nga inawaganda a “mini-trial” a kunada a mangipakpakita ti “abuse and corruption” ti sumagmamano a miembro ti komite.
