LAOAG CITY – Pormalen a nangipatulod ti Notice to Respondent ti House Committee on Justice ken ni Vice President Sara Duterte mainaig iti dua a verified impeachment complaints kontra kenkuana.
Iti abiso a napetsaan ti Marso 4, 2026, a naipatuluden iti Office of the Vice President iti Mandaluyong City, naibilin ken ni Duterte a mangisumitir ti verified answer na iti uneg ti 10 nga aldaw a saan a mabalin nga itantan kas maiyataday iti House rules iti impeachment proceedings.
Basar iti komite nga idaulwan ni Rep. Gerville “Jinky Bitrics” Luistro, nakita ti sufficient in substance dagiti reklamo nga impeachment kontra iti bise presidente.
Ti dua a reklamo ket inpila da Joel Saballa ken Atty. Nathaniel G. Cabrera.
Nagballaag met ti komite a no saan a mangisumitir ti sungbat iti naikeddeng a panawen, maibilang daytoy a panangtallikud iti karbengan a sumungbat ken kaipapanan daytoy ti panagkedked kadagiti alegasyon.
Iti agdama, naawaten ti Office of the Vice President ti nasao nga abiso.
Basar iti pagalagadan ti kamara de representantes, kasapulan a mangisumitir nga umuna ti verified answer ti respondent sakbay nga ituloy ti komite ti sumaruno a lebel ti deliberasyon dagiti reklamo.
