LAOAG CITY – Naiget a naglikudan ni House Committee on Higher and Technical Education Chairman ken Tingog Partylist Rep. Jude Acidre a “political attack” ti inaramid na a panangdillaw ti poor performance ti Department of Tourism iti babaen ti panangidaulo ni Secretary Christina Frasco.
Segun ken ni Acidre, sungbatan koma ni Frasco ti isyu ken saanna nga iliklik a daytoy ket political attack.
Mangnamnama ni Acidre a lawlawagan ni Frasco daytoy gapu ta no agtultuloy a lumiklik ken saanna a nasayaat para iti pudno nga isyu.
Inkalintegan pay ti House leader a ti isyu ket awan ti pakainaigan iti pulitika no di ket kalikagom na laeng a masigurado ti responsable ken epektibo a panangusar ti pampubliko a pondo.
Innayon ni Acidre a ti saan a panangdakamat ni Presidente Ferdinand Marcos Jr. iti Department of Tourism iti maikapat nga State of the Nation Address na ket dakkel a saludsud no adda metlaeng ti ar-aramiden ti ahensya.
Basar iti kaudian a findings ti Commission on Audit (COA), dinakamat ni Acidre dagiti sumagmamano a glaring issues a nakairamanan ti Department of Tourism ken ti marketing arm ti Tourism Promotions Board.
Mainaig iti daytoy, kinondenar pay ni Acidre ti claim ni Secretary Frasco ti P200 million tourism promotion budget ket nagresulta iti ₱3.86 trillion visitor receipts.
Inpaganetget ti kongresista a ti nasao a claim ket misleading gapu ta basar iti Philippine Statistics Authority, ti nasao a figure ket mangirepresentar ti pakabuklan nga output ti tourism industry manipod iti airlines ken hotels, saan a direct return manipod iti nagastos ti ahensya.
