LAOAG CITY – Dinoble ti House of Representatives ti cash grant ni Carlos Yulo kalpasan a nangabak iti dua a gold medals iti 2024 Paris Olympics, no sadinno nga umaboten iti 6 a milyon a pisos.
Immuna nga inwaragawag ti House Appropriations Committee Chairman ken Ako Bicol Partylist Rep. Zaldy Co nga ipaay ti Chamber iti P3 million gapu iti panangabakna iti gold medal idi napan a Sabado
Ni Yulo ti kaunaan a Filipino a nakaawid iti dua a balitok a medalya manipud iti Olympics
Segun ken ni Speaker Martin Romualdez, malaksid iti cash incentives, umawat met ni Yulo ti congressional medal gapu iti naisangsangayan a kontribusionna iti sports ti Pilipinas.
Ti cash incentives manipud iti Kamara ket mainayon iti P10-milion nga insentibo a mabalin a maala ti maysa a Filipino Olympic gold medalist maibasar iti linteg.
Nangisayangkat met ni Speaker Romualdez iti fundraising initiative kadagiti mammanday-linteg tapno maited pay ti kanayonan nga insentibo ken ni Yulo.
Kabayatanna, dinayaw ni Speaker Martin Romualdez ni Yulo ket kinunana nga isu ket “once-in-a century athlete” kalpasan a nangabak iti dua a balitok a medalya iti Paris Olympics.
