LAOAG CITY – Agsagsaganan ti House prosecution panel iti naikeddeng nga oral arguments iti 2/3-vote threshold iti agtultuloy nga impeachment trial kontra ken ni Vice President Sara Duterte.
Mangiwayat ti oral arguments ti Senate Impeachment Court inton sumaruno a lawas no sadinno ket naimbitaran ditoy dagiti dati a mahistrado ti Korte Suprema tapno ilawlawagda ti umno a panangkwenta ti 2/3 vote manipud iti pakabukelan a miembro ti Senado, partikular kadagiti senador a saan a nakaatatendar iti panaglitis.
Segun ken ni Atty. Hez Montalan, Deputy Spokesperson ti House Prosecution panel, naiget ti panangtingiting ti legal team-da iti amin nga adda pakainaiganna iti linteg ken jurisprudence nga ipasangoda iti korte.
Kinuna ti abogado a pabor ti partido ti proseckusion a mabaliwan ti denominator manipud iti pakabukelan a 24 a senador ken ibilang laeng dagiti aktibo a makipaspaset iti trial.
Nupay kasta, inpanagetgetna ti panangrespetarda iti aniaman nga agbalin a desision ti impeachment court.
Kabayatanna, inpetteng pay ti House panel ti importansia ti pannakaipaayab ken ni Davao City Mayor Baste Duterte kalpasan ti panangaprubar ti impeachment court iti pannakipatulod ti subpoena para iti panagsangona iti trial inton sumaruno a lawas.
Mainaig iti daytoy, manamnama ti panangilawlawag ti Mayor kadagiti rekord ti negosio ti Bise Presidente nga idadauloan ti Office of the City Mayor, ken nailawlawag ditoy a ti pannakaipaayab kenkuana ket basar iti opisial a kapasidad ken awan ti pakainaiganna iti relasionda nga agkabsat.
