LAOAG CITY – Kwinestyunaran ti House prosecution ti panagkedked ti kampo ni Vice President Sara Duterte a malukatan ti kahon ti Bureau of Internal Revenue (BIR) a naglaon kadagiti tax document, uray maipagarop karaman dagitoy kadagiti ebidensya a nakailatang ti depensa iti impeachment trial.
Segun ken ni House trial spokesperson ken Lanao del Sur Rep. Zia Alonto Adiong, napateg dagiti dokumento iti isyu ti Statement of Assets, Liabilities and Net Worth (SALN) ken alegasyon a saan a mailawlawag a kinabaknang kontra iti bise presidente.
Inpetteng ni Adiong nga awan ti plano ti prosekusyon a lukatan ti kahon nga awan ti depensa, isut gapuna a nakakaskasdaaw ti panagkedked da.
Inbatad met ni Atty. Benjamin Tolosa Jr. a kayat ti prosekusyon a malukatan ti BIR box iti babaen ti panangiwanwan ti impeachment court ken iti presensya ti agsumbangir a partido tapno maimbentaryo ken mamarkaan dagiti dokumento a naipalaon iti daytoy.
Inlawlawag ni Tolosa a mabalin paylaeng nga ibilin ti impeachment court ti pananglukat ti BIR box sakbay ti umuna a panagdengngeg intono Hulyo 6 wenno kabayatan ti panagtultuloy ti trial.
