LAOAG CITY – Saan a maawatan ti House prosecution panel no sadinno ti ibagbaga ni Vice President Sara Duterte a panaglabsing iti linteg iti iwaywayat nga impeachment trial.
Inpetteng ni House trial spokesperson Renee Co ti Kabataan Party-list a basar iti impeachment trial a nakalawlawag nga iti panaglabsing iti linteg ket napasamak iti saan nga umno a panagusar ti confidential funds ti Office of the Vice President (OVP) ken Department of Education (DepEd) idi panawen a sekretario pay laeng ni Vice President Duterte.
Inlawlawagna a naruay ti mangpadpadaanan iti agbalin a palawag ti defense team ni Vice President Sara mainaig iti findings ti Comission on Audit a naaddaan ti iregularidad iti panagusar ken liquidation ti confidential funds ti Office of the Vice President ken Department of Education.
Kunana a nakalawlawag a rimmuar iti impeachment trial a ginastos ti Office of the Vice President ken Department of Education iti saan a nasken ken confidential funds ken saan daytoy a nasuportaran dagiti maiyannatop a dokumento kas kadagiti ebidensia.
Makapadanag met para ken ni prosecution Legal Spokesperson Atty. Benjamin “Jay” Tolosa Jr. dagiti rakurak ni Vice President Sara a “bending the law” ken nariribok ti impeachment proceedings.
Kuna ni Tolosa a dagiti nasao a rakurak ti Bise Presidente ket mabalin a mangitunda ti panagduddua iti integridad ti panangusig a maysa a constitutional process kasta pay iti Senate Impeachment Court.
