LAOAG CITY – Inpasigurado ti House Quad Committee nga itultuloyda nga ilungalong ti hustisia para kadagiti biktima ti nadara a drug war ti Duterte administration.
Malaksid iti Committee Public Order and Safety, karaman iti Quad Committee ti Committees on Dangerous Drugs, Human Rights ken Public Accounts.
Masapol daytoy nga imbestigaren dagiti extrajudicial killings, seknan iti iligal n droga, operasion ti iligal a Philippine Offshore Gaming Operators (POGO) ken panaglabsing kadagiti karebbengan dagiti tattao iti pannakaipatungpal ti Duterte drug war.
Basar iti datos ti gobierno, sumurok 6 a ribu ti natay iti operasion dagiti pulis manipud idi 2016 aginhgga idi 2021 ngem adayo daytoy iti 27 a ribu agingga 30 a ribu a kaso ti extrajudicial killings basar kadagiti human rights advocates ken organization.
Iti panagdengngeg ti Quad Committee, kinumpirmaran ni retired P/Col. Royina Garma nga adda ti maaw-awat a reward dagiti pulis kadagiti mapatayda a drug suspect nga agbalor ti 20 a ribu a pisos agingga iti maysa a milyon a pisos.
Kinumpirmaran daytoy ti Davao Death Squad, maysa nga organisasion a maipagarup nga adda iti likudan dagiti panangpapatay kadagiti drug suspect nga agop-operar idi ni dati a Presidente Rodrigo Duterte ti Mayor ti siudad.
Iti testimonia met ni dati a Sen. Leila de Lima ti reward system idiay Davao City ket inpatungpal ni Duterte iti intero a pagilian idi isuna ket nagbalin a Presidente.
Kabayatanna, daytoy ti rumrummuar a rason iti panagngato ti bilang dagiti kaso ti panaglabsing kadagiti karebbengan dagiti tattao ken extrajudicial killings.
