LAOAG CITY – Dinayaw ni Speaker Ferdinand Martin G. Romualdez ti “zero billing” initiative ni Presidente Ferdinand “Bongbong” R. Marcos Jr. a gagem na a matulungan dagiti marigrigat a pasyente.
Segun ken ni Speaker Romualdez, ti “zero-billing” initiative ket maysa a pakasaritaan nga healthcare program no sadinno a mangipaay ti libre a serbisyo medikal ti 22 a pampubliko nga ospital iti pagilian.
Maipalagip nga iti maika-67 a kasangay ni Presidente Marcos idi Setyembre 13, inlungalong na ti inisyatiba a maibilang a maysa a napateg nga addang iti panangipaay ti nalaka laeng a serbisyo iti salun-at para iti amin a Pilipino.
Iti direktiba ti presidente, nangilatang ti Department of Health (DOH) ti P328 milyon tapno pondoan ti zero-billing initiative a mangsakop, saan laeng a kadagiti mabayadan iti ospital no di ket uray dagiti agas ken dadduma a napapateg a serbisyo medikal kas ti chemotherapy, dialysis, dental a serbisyo, ke dagiti laboratory procedure.
Ti nasao a programang ket immuna a naipatungpal kadagiti dadakkel nga ospital, karaman ditoy iti National Capital Region, (NCR), Luzon, Visayas, ken Mindanao.
Inpaganetget ni Speaker Romualdez ti dakkel nga epekto ti nasao nga inisyatiba iti biag dagiti Pilipino, kangrunaan na dagiti marigrigat wenno vulnerable community gapu ta kissayan na ti dakkel a magastos iti serbisyo medical.
Karaman iti zero-billing program ti walo a kangrunaan nga ospital iti National Capital Region, kas ti National Kidney and Transplant Institute ken Philippine General Hospital, kasta met ti 14 a dadduma pay nga ospital a masarakan iti Luzon, Visayas, ken Mindanao.
Inpetteng pay ti lider ti kamara de representantes nga agtultuloy nga agpanpanunot ti gobierno kadagiti wagas tapno palawaen dagiti serbisyo para iti salun-at ken pagbalinen a nalaka ken alisto a ma-access para iti amin.
