LAOAG CITY – Ginutigot ni House Speaker Ferdinand Martin Romualdez dagiti botante nga agtalinaed nga alerto ken tingitingen da a naimbag dagiti kandidato para iti 2025 Midterm Election tapno makaliklik iti maysa manen nga Alice Guo.
Inbalakad ni Romualdez a masapol nga am-amwen a naimbag dagiti kandidato ken iberipikar dagiti kwalipikasyon da.
Maipalagip nga immunan nga inbatad ti election lawyer a bayat a maim-imbestigar ni Guo mainaig iti koneksyon na iti illegal Philippine offshore gaming operators ken saan pay a nasentensyaan, mabalin na paylaeng ti agpaidasig iti aniaman a posisyon iti gobyerno.
Mainaig iti daytoy, inbatad ni Commission on Election Chairman George Garcia nga awaten paylaeng ti komisyon ti certificate of candidacy ni Guo ngem adda ti grounds tapno madiskwalipikar ti dati a mayor.
