LAOAG CITY – Nagyaman ni Speaker Ferdinand Martin G. Romualdez iti US $50,000 wenno katukad ti P2.925 milyon a donasyon ti Singapore Red Cross para kadagiti naapektaran ti super typhoon Carina.
Segun ken ni Speaker Romualdez, ti donasyon ket dakkel a tulong tapno al-alisto a makabangon dagiti biktima ti bagyo.
Inbatad ni Benjamin William, Secretary General/ Chief Executive Officer ti Singapore Red Cross, a ti pondo ket mausar tapno suportaran ti “emergency operations” ti Philippine Red Cross, iti panangipaay ti tulong kadagiti naapektaran ti naglabas a kalamidad.
Immunan a nangipaay ti tulong ni Speaker Romualdez ken dagiti kakadwa na iti kamara de representantes kadagiti kangrunaan a naapektaran ti bagyo Carina ken ti epekto ti abagat.
Maipalagip nga iti napan a lawas ket indaulwan ti mangidadaulot ti kamara de representantes ti panagibunong ti relief goods iti nagduduma a lugar iti Metro Manila partikular iti ciudad ti San Juan, Marikina, Navotas, ken Quezon City.
