LAOAG CITY – Dinayaw ni Speaker Ferdinand Martin G. Romualdez ti pannakapagbalin a linteg tapno saanen nga agbayad ti entrance examination fee dagiti kuwalipikado nga agad-adal a kayat na ti sumrek iti pribado a kolehiyo.
Ti nasao a gakat ket rinatipikaran ti Kamara de Representantes ken Senado idi Mayo ita a tawen ken nagbalin a naan-anay a linteg kalpasan ti 30 nga aldaw kalpasan nga awan ti nagbalin nga addang kontra iti daytoy ni Presidente Ferdinand Marcos Jr.
Gagem ti gakat a maipaayan ti oportunidad dagiti kuwalipikado nga agad-adal nga addaan ti pinansyal a limitasyon tapno maka-eksamen kadagiti pribado a kolehiyo.
Iti babaen ti maysa a surat ket indanun ni Executive Secretary Lucas Bersamin ken ni Speaker Romyaldez a nagbalinen a naan-anay a linteg ti gakat ken nagbalin Republic Act No. 12006 idi Hunyo 14 ita a tawen.
Maipalagip nga iti babaen ti Konstitusyon, adda laeng ti 30 nga aldaw ni Presidente Marcos tapno pirmaan wenno i-veto ti maysa a gakat a rinatipikaran ti kongreso.
No awan ti agbalin nga addang ti presidente ket agbalin a naan-anay a linteg ti gakat kalpasan ti 30 nga aldaw.
Binigbig ni Speaker Romualdez ti nalawlawa nga implikasyon ti linteg a mangital-o ti maysa a komunidad a makatulong iti pannakapadur-as ti pagilyan.
Ibilbilin ti baro a linteg iti amin a pribado a kolehiyo a libre ti entrance examination dagiti estudyante a mangipakpakita ti dakkel a potensyal na iti akademiko ngem awan ti pagbayad na iti examination fee.
Manamnama a rinibo nga aga-adal iti pagilyan ti maikkan ti gundaway nga ageksamen kadagiti pribado a kolehiyo.
Agtalek pay ti house speaker a ti baro a linteg ket agbalin a dana para iti ad-adda nga inklusibo ken patas a sistema ti edukasyon iti Pilipinas.
