LAOAG CITY – Inpasigurado ni House Speaker Martin Romualdez nga iti kada piso iti 2026 national budget ket adda ti pakailatangan na ken iti kada magastos ket rumbeng a pakairanudan ti tao.
Siguradwen pay ni Speaker Romualdez a ti P6.793 -trillion a national budget ket addaan ti nalawag a purpose ken makaipaay ti dakkel a benepisyo iti umili.
Ti 2026 National Expenditure Program ket katukad ti 22 porsiyento ti Gross Domestic Product ti pagilian ken 7.4 percent a nangatngato ngem iti P6.326-trilyon a budget iti napalabas a tawen.
Segun iti Department of Budget and Management (DBM), ti kadakkelan a paset ti pondo met mailatang iti sektor ti edukasyon nga agbalor ti ₱1.224 trilyon, sumaruno ti imprastruktura nga addaan ti ₱881.3 bilyon, ken iti sektor ti salun-at nga agbalor ti ₱320.5 bilyon.
Ti plano a panaggastos iti sumaruno a tawen ket nakaangkla iti Philippine Development Plan 2023-2028 ken iti napaot a pangirigan ni Presidente Ferdinand R. Marcos Jr.
Inkalintegan pay ni Speaker a ti National Expenditure Program ket ti plano ti gobierno a matungpal ti arpaap iti babaen ti Bagong Pilipinas a maiyasideg ti gobyerno iti komunidad, maaddaan ti umdas ken nalaka a taraon, ad-ado a pagadalan, ospital, ken natalge a komunidad.
