LAOAG CITY – Kinontra dagiti lider ti “Young Guns” ti House of Representatives ti rakurak ni Vice President Sara Duterte a maipagarup nga us-usaren kenkuana ti gobierno ti “Arnie Teves playbook.”
Inpetteng dagiti kongresista, maysa daytoy a baro a “budol” ken desperado a taktika tapno maiyaw-awan ti atension ti publiko manipud kadagiti nadadagsen nga alegasion kenkuana kas ti maipagarup nga iregularidad iti pannakausar ti P612.5 a milyon a confidential funds.
Indasig ni Duterte ti kasasaadna ken ti dati a Negros Oriental Rep. Arnolfo “Arnie” Teves Jr. a naideklara kas terorista ti Anti-Terrorism Council.
Segun kenkuana, adda dagiti sumagmamano a maipagarup nga agus-usar ti kapada a taktika tapno i-freeze dagiti sanikuana.
Naglikudan met ni House Assistant Majority Leader ken Zambales 1st District Rep. Jay Khonghun ti rakurak ni Duterte ken inbagana a dagiti problema a sangsangoen ti Bise Presidente ket gapu kadagiti inaramidna.
