LAOAG CITY – Narugyanen ti household monitoring para iti A4 priority group iti ili ti Dingras.
Daytoy ti inbatad ni Mrs. Mildred Fernando, ti Barangay Health Worker (BHW) Federated President iti ili ti Dingras.
Karaman iti A4 priority group ket dagiti essential workers,
aglaklako iti tiendaan, security guard, janitor ken dadduma pay.
Inadmitir ni Fernando nga ado latta dagiti mabuteng ken agdudua nga agpabakuna kontra iti covid-19 a kailian da.
Inbaga na a ti palawag dagiti sumagmamano a kailian da ket agamak da amangan no sabali ti pagsaadan iti bagida ti maitudok kadakuada a bakuna.
Nupay kasta, kuna ni Fernando a saan da nga agsardeng a mangallukoy ken mangipaawat kadagiti maseknan ti kinapateg ti panagbakuna kontra iti covid-19.
