LAOAG CITY – Naiget ti panagmonitor ti Highway Patrol Group kadagiti agibiayahe kadagiti illegal a paputok nga agturong ditoy probinsya.
Daytoy ti inbatad ni Police Lt. Edward Mabotas Jr., ti Deputy Chief iti Ilocos Norte Highway Patrol Group.
Kuna na a naiget ti koordinasyon da kadagiti nagduduma a municipal police stations tapno agtitinnulong da nga agbantay ken agmonitor kangrunaan na ket dua laengen nga aldaw, sarabwen ton ti baro a tawen.
Innayon na a gagem ti naiget a panagmonitor da ket tapno masigurado nga awan dagiti makaiserrek kadagiti illegal a paputok ditoy probinsya.
Mainaig iti daytoy, kuna ni Mabotas a no adda ti masalamaan da nga agibiayahe ti illegal a paputok ket i-impound da ti lugan dagiti maseknan ken kumpiskaren da dagiti bitbit da nga illegal a paputok.
