LAOAG CITY – Natiliw ti maysa a babai bayat ti entrapment operation nga inyuswat ti NBI Laoag District Office gapu ti maipagarup a panangibugaw na dagiti tallo a biktima.
Nabigbig daytoy a ni Queen Jollibee Bagasol y Ubaldo, addaan ti umno nga edad, awanan ti asawa ken residente ti Brgy. 6 ditoy ciudad ti Laoag.
Segun ti PNP, nakaawat ti NBI iti impormasyon mainaig ti panagibugaw rason a nakikoordinar da iti gobyerno ti siudad ti Laoag kangrunaan ti opisina ti social welfare.
Binirok da ti nasao a suspek idi ta nagpammarang da met a customer.
Gapu iti daytoy, nakitinnulag ti suspek nga ikabil na dagiti tallo a babbai iti Kingscourt Hotel iti Brgy. Barit, Laoag City.
Naamoan nga dua a ribo a pisos ti bayad ti kada babbai kasukat ti pannakinaig da kadagiti nagpammarang a custumer.
Idi adda dagiti nagpammarang a customer iti kuarto ti nasao nga hotel idi ta inyawat da ti kuarta, kageddan metten ti panangkemmeg da kenni Bagasol.
Dua kadagiti naisalakan a babbai ket agtawen ti 15 ken agtawen ti 16 idinto a ti maysa a babai ket agtawen ti 21.
Maisagsaganan ti kaso a maipila kontra ti suspek mainaig ti panaglasbing ti Republic Act 9208 wenno Anti-Trafficking in Persons Act of 2003.
