LAOAG CITY – Kinumpirmaran ni Atty. Diosdado Araos iti National Bureau of Investigation (NBI) ditoy probinsya ti pannakatiliw ti maysa a babai a human trafficker.
Segun kenni Araos, babaen iti pannakatiliw ti human trafficker ket narescue da met dagiti dua a babbai a biktima daytoy.
Inlawlawag na nga idi pay laeng napalabas a tawen nga imonmonitor da ken namin-ado da a nagplano ti entrapment operation ngem saan da a matiltiliw ti suspek.
Nupay kasta, kunana a babaen iti tulong ti asset ket natiliw da ti suspek iti maysa nga hotel ditoy ciudad ti Laoag.
Inbatad pay ni Araos a ti nasao a babai ket isu ti dati a maibugbugaw ngem itan ket isuna ti agibugbugaw ti babbai kadagiti lallaki nga agbirok kenkuana ditoy probinsya.
Kunana a nabayagen a kastoy ti aktibidad ti suspek ken no adda ti abgbirok kenkuana ket tawagan na met dagiti biktima na ken ditoy met a maiyawat ti kwarta.
Naamoan pay nga adda dagiti menor de edad a biktima ti nasao a suspek.
Gapo iti daytoy, naipila dan ti kaso a panaglabsing iti RA 9208 wenno ti Anti-Trafficking in Persons Act of 2003 ken nagtalinaed ti babai iti kustudiyar ti PNP-Laoag.
