LAOAG CITY – Arapaap ti gobierno probinsial nga agbalin nga “host province” ti probinsia nga Ilocos Norte iti sumaruno nga Region 1 Athletic Association Meet.
Daytoy ti pinasingkedan ni Senior Board Member Matthew Marcos Manotoc , Chairman ti Committee on Youth and Sports.
Gapu iti daytoy, imbatad ti bokal nga addan ti pakpakauna a panagkinammayet na iti Department of Education babaen ti panangidaulo ni Mrs. Vilma Eda, Deped Supervisor ken ti gobierno probinsial tapno masaganaan a nalaing daytoy no maibanag ti arapaapda.
Kuna ni Manotoc a kumit-kitada dagiti mabalin a tumulong kas ti Alumni of the School of Tomorrow System para ti pannakapasimpa ti synthetic track ti Marcos Stadium ken dadduma pay a facilities a kasapulan.
Babaen iti daytoy, mabalin a kabaelanton ti probinsia nga agbalin a “ host province” iti R1AA ngem nalidem pay laeng nga agbalin a host ti probinsia kadagiti national sports competition.
Aminado ti bokal nga adu pay dagiti nasken a masimpa iti Marcos Stadium tapno maipaneknek ken mabigbig ti probinsia a kas center for sports tourism.