LAOAG CITY – Naragsakan ni Mr. Sonny Africa, Executive Director ti IBON Foundation iti naminsan manen a panangipila ti Makabayan bloc ti P1,200 living wage hike bill.
Segun kenkuana, panawenen ti pannakaipatungpal ti nasao a living wage hike bill a dakkel a panagnam-ayan dagiti naruay a mangmangged ditoy pagilian ken ti pannakaikkat ti minimum wage board.
Inbatadna a kabaelan daytoy dagiti babassit a negosiante iti nayon a sueldo dagiti empleado dagitoy babaen iti tulong ti gobierno.
Inlawlawagna a basar iti kaudian a datos ti Philippine Statistics Authority ket adda ti 50 a ribu a negosio iti intero a pagilian ti dimmalan iti survey pakairamanan dagiti Micro Small and Medium Enterprise no sadinno a ti pannakaipaay ti 1,200 kadagiti mangmangged ket katukad laeng iti 40 a porsiento a tubo dagiti negosiante.
Mainaig iti daytoy, inpakaammo ni Africa a sakbay ti Hulio 1989 ket maymaysa laeng ti sueldo dagiti mangmangged iti intero a pagilian agingga a napanunotan a mabingay daytoy iti kada rehion iti pammati a nagduduma ti presio dagiti magatgatang iti kada lugar.
Gapu iti daytoy, immannugot ni Africa a masukatan ti Regional Wage Board iti National Wages and Productivity Board tapno agbalin nga agpapada iti pannakaipangato ti sueldo.
Innayonna a mangnamnama daytoy nga ikagumaan dagiti agpanpanday linteg iti panangipasa ti nasao a gakat tapno ad-adda a matulungan dagiti naruay a Pilipino iti baet ti kinarigat iti panagbiag.
