LAOAG CITY – Naiget a kinondenar ti Integrated Bar of the Philippines (IBP) Ilocos Norte Chapter ti pannakapaltog ti maysa nga abogado ken dua nga empleado ti korte ditoy probinsya.
Segun ti grupo, ti mapaspasamak a kinadamsak kadagiti abogado ken court employees ket mangitunda ti “environment fear” iti biang ti justice system.
Inbatad ti IBP a saan a maaramid dagiti abodago ti trabaho da no ti biag da ken biag ti pamilya da ket adda iti peligro.
Inpetteng ti grupo a masapol a maisardeng ti panagatake kadagiti abogado ken empealdo ti korte ken masapol nga agari ti rule of law iti anyaman nga oras.
Gapo iti daytoy, inbatad ti IBP nga agmaymaysa da nga agpanpanawagan ti seryoso ken “credible” nga imbestigasyon iti nagsaruno a pammaltog iti maysa nga abogado ken dua nga empleado ti korte.
Daytoy ket tapno maamoan no anya ti pudno a motibo dagiti akin-aramid ti krimen ken magun-od ti hustisya iti nasao a pasamak.
Maipalagip a napaltogan idi Setyembre 29 ni Atty. Jason Perera ken agdama nga adda iti ospital ken idi laeng Oktubre 1 ket natay ni Randel Villaruz, OIC clerk of court iti RTC Branch 65 ditoy ciudad ti Laoag ken nakasugatan ni Teodorico Dagupion, court process server iti nasao met laeng a korte.
