LAOAG CITY – Mangnamnama ti Integrated Bar of the Philippines (IBP) a maimplementar a nasayaat ti Anti-Terrorism Act a pinirmaan ni Presidente Rodrigo Duterte.
Segun kenni Atty. Domingo Cayosa, ti presidente ti IBP, inpasigurado ti Malakanyang a saan a maabuso ti pannakaimplementar daytoy.
Ummuna iti daytoy, innala ti Malakanyang ti komento ti IBP ken naibaga dagiti agpanpanday linteg a dagiti saan a nawalag a probisyon ket malawlawagan to iti Implementing Rules and Regulations (IRR).
Kuna ni Cayosa a ti kangrunaan a komento da ket ti bileg dagiti mangipatungpal iti daytoy gapo ta saan laeng a dagiti nanganato ti posisyon na ti mabalin nga agtiliw kadagiti mapagat-atapan a konektado iti addang ti terorismo.
Inpetteng na a mabalin a maabuso ti linteg iti local level gapo ta no ti agtiliw ket kalaban na ti maysa a tao, mabalin na nga akusaran daytoy a m angiyus-uswat ti terrorism act uray saan a kastoy ti inaramid ti maseknan.
Inbatad na pay a dagiti kwestyunable a probisyon a mabalin a maikontra iti konstitusyon ken dagiti posible a maabuso ket mabalin na nga iyuli iti korte ti kaso.
Mainaig iti daytoy, kuna ni Cayosa nga inlawlawag ni Sen. Panfilo Lacson iti IBP nga awan ti poder ti Anti-Terrorism Council a mangisyu ti authority to arrest.
Nupay kasta, kunana nga iti Rule 113 iti Rules of Court ket adda ti exemption no sadinno nga uray awan ti warrant of arrest no makitkita ti maseknan a law enforcer nga adda ti ar-aramiden a krimen wenno balod a naglibas ket mabalin latta a matiliwen a dagus uray saanen a dumalan iti korte.
