LAOAG CITY – Mangnamnama ni Atty. Domingo Cayosa, Integrated Bar of the Philippines (IBP) President nga ad-adda a mapaalisto ti panagresolbar kadagiti kaso a nakapenpen iti korte kalpasan ti pannakadutok ni Chief Justice Diosdado Peralta.
Segun kenni Cayosa, nagaget ken alisto ti panagtrabo ni Peralta kadagiti kaso kangrunaan na dagiti naipaima kenkuana.
Inbatad na a ti kanayun a gagem ni Peralta ket alisto a malpas ti maysa a trabaho ken babaen iti baro a chief justice ket mabenipisyaran dagiti marigrigat tapno magun-od ti hustisya.
Inlawlawag na a dakkel a tulong para iti hudikatura ti pannakadutok ni Peralta gapo ta saan a linged a nabayag ti hustisya ditoy Pilipinas no ikumpara iti sabali a pagilyan.
Mainaig iti daytoy, kuna ni Cayosa a kas iti rekord ni Peralta seknan iti graft and corruption ket al-alisto ti proseso dagitoy a kaso ken kadagiti dadduma pay a kaso.
Inpasigurado pay ni Cayosa ken ti sibubukel nga IBP a nakasagana a makitinnulong kenni Peralta kas iti panagkalikagom da a baliwan ti sistema ti hustisya ditoy pagilyan babaen iti baro a chief justice.
Innayon na a pannakaibabain para kadakuada nga abogado ti nabayag a pannakagun-od ti hustisya.
