LAOAG CITY – Inlawlawag ni Atty. Bernie Constantino, ti presidente ti Integrated Bar of the Philippines (IBP) – Ilocos Norte Chapter nga awan ti masalungasing iti linteg nu agipost iti social media.
Daytoy ket mainaig pay laeng iti Facebook Page wenno facebook group nga LTO Alert Ilocos Norte no sadino a maipakpakamo nga adda ti checkpoint iti maysa a lugar.
Inbatad ni Constantino a nu ti gagem ti post ket mangipakaamo laeng iti publiko nga adda ti checkpoint, awan ti masalungasing a linteg.
Nu pay kasta, inlawlawagna a nu ti gandat ti maysa a post ket negatibo wenno mangballaag laeng kadagiti awanan ti lisensya, helmet, addaan ti naringgor a pipe pakairamanan dagiti nakaaramid ti krimen ket dita nga adda ti obstruction of justice.
Mainaig iti daytoy, kuna ni Constantino a ti maysa pay a grupo a mangus-usar ti nagan wenno logo ti LTO nga awanan ti pammalubos ket maibilang daytoy a usurpation of authority.
Innayun na a karaman ditoy ti panangipakaamo ti operasyon ti checkpoint iti laksid nga awan ti pammalubos ti LTO wenno siasinoman nga otoridad.
Kabayatanna, inbatad met ni PLt. Col Rafael Lero, ti hepe ti PNP-Laoag a nasken a maamoan kadagiti agi-popost ti intensyon ti post seknan ti chekpoint nga iyus-uswat dagiti otoridad.
Segun ken ni Lero, nu bilang ti intensyon ti panagipost ket tapno maballaagan dagiti motorista a saan a dumalan kadagiti nakaiyestablisaran ti checkpoint patikular kadagiti agiturturong ti aniaman a klase ti behikulo nga awanan ti lisensya, helmet ken dadduma pay nga umno a dokumento ket adda ti masalungasing iti linteg.
Inbatad ni Lero nga iresponsable nga aramid daytoy agsipod ta ad-adda a magutigot dagiti agiturturong ti behikulo nga agsalungasing iti linteg.
Kiniddaw ti hepe a masapol kuma nga agtitinnulong para iti pannakalikik ti krimen ken panakaipaay ti seguridad iti amin.
