LAOAG CITY – Binilin ti Appeals Chamber ti International Criminal Court (ICC) ti Office of the Prosecutor ken Office of Public Counsel for Victims (OPCV) a mangisubitir ti nayun nga obserbasyon iti pannakaibasura ti apela ni dati a Pres. Rodrigo Duterte a mangkukwestyun iti hurisdiksyon ti kaso.
Iti innem a pinanid a desisyon a napetsaan ti Disyembre 16 ket inbatad ti ICC Appeals Chamber a napateg daytoy tapno maamoan ti usto a disposal ti apela.
Naipaayan daytoy agingga iti alas-4 ti malem ti Enero 16, 2026 tapno agisubmitir ti nayun nga obserbasyon idinto a ti kampo ni uterte ket agingga iti alas-4 ti malem ti Enero 23, 2026.
Nagkedked pay ti Appeals Chamber iti kiddaw ti depensa a mangipaay da ti sungbat iti nagbalin a komento ti Deputy Prosecutor mainaig iti apela dagiti abogado ti dati a presidente nga awan ti hurisdiksyon ti ICC gapo ta nagikkat ti Pilipinas iti ICC.
Mapalagip nga idi Nobyembre ket nagpila ti abogado ni Duterte ti Appeals Brief a mangidetdetalye ti argumento iti kiddaw da a mabaliktad ti desisyon ti Pre-Trial Chamber I ken ti panangkiddaw da iti dagus ken unconditional release iti dati a presidente.
Kiniddaw pay ti Office of the Prosecutor ken OPCV iti ICC Appeals Chamber nga ibasura ti apela ti depensa a mangkwestyun iti jurisdiction na iti kaso ni Duterte.
Inpetteng ti Office of the Prosecutor nga ul-uliten laeng ti kampo ti dati a presidente dagiti naibasura nga argumento.
