LAOAG CITY – Nangiparuk-aten ti International Criminal Court (ICC) mainaig iti report nga addan ti arrest warrant kontra ken ni Senador Ronald “Bato” Dela Rosa.
Inlawlawag ti International Criminal Court nga awan pay ti public arrest warrant a naiparuk-at nga adda ti pakainaiganna iti Pilipinas.
Binalakadan ti International Criminal Court ti publiko a nasken a dumngeg laeng kadagiti opisial a rakurak ken liklikan ti panagiwaras ti saan a naberipikar nga impormasion manipud iti online.
Immunan nga inrakurak ni Interior Secretary Jonvic Remulla nga agsagsaganadan nga adda ti 10,000 a task force para iti panangarestar iti Senador no bilang maiparuk-at ti warrant of arrest manipud iti International Criminal Court.
Nupay kasta, inadmitir ni Remulla nga awan pay ti naawatda nga aniaman a kopya ti arrest warrant manipud iti International Criminal Court.
Maipalagip a ni Dela Rosa ket nagserbi kas Philippine National Police chief idi panawen ni dati a Presidente Rodrigo Duterte a maitudtudo ita iti nadara a war-on-drugs a naipila iti International Criminal Court.
