LAOAG CITY – Dinillaw ni International Criminal Court (ICC) Trial Chamber III judge Joanna Korner ti depensa ni dati a Presidente Rodrigo Duterte gapu iti maipagarop a panagkedked na a makitinnulong iti prosekusyon tapno makissayan ti kaado dagiti dokumento nga usaren iti panangusig iti kaso a crimes against humanity.
Iti maikapat nga status conference, inlungalong ni senior trial lawyer Julian Nicholls ti prosekusyon nga agtulag ti agsumbangir a partido iti bilang dagiti opisyal a rekord tapno maikkat ti 42,511 a dokumento ken makissayan ti 6,863 item ti pormal a listaan ti ebidensiya.
Karaman kadagiti naidiaya ket ti panangala ti independent expert ken panangipaay iti depensa ti gundaway a tingitingen ti wagas ti panagbilang ken panangklasipika dagiti dokumento.
Segun ken ni Nicholls, maipagarop a nagkedkedan ti depensa dagiti nailungalong a maaramid.
Inbatad met ni judge Korner ken ni lead defense counsel Peter Haynes nga arigna ar-aramiden ti prosekusyon ti amin tapno tumulong, ngem saan nga awaten ti depensa.
Inpetteng ni Haynes a lima a tawenen nga iggem ti prosekusyon dagiti dokumento ngem saan pay a natingiting a naimbag ti analyst wenno abogado.
Kuna na a nsurok a 35,000 a pinanid ti kasapulan nga adalen ken possible nga agkasapulan daytoy ti dedikado a team ti nasurok a maysa a tawen.
Naglikudan met ni Nicholls ti alegasyon a mangnamnama ti prosekusyon iti Artificial Intelligence imbes a tingitingen ti tao.
