LAOAG CITY – Nagkedkedan ti Pre-Trial Chamber I ti International Criminal Court (ICC) ti apela ti defense team ni dati a Presidente Rodrigo Duterte a baliktaden ti desisyon a magibagbaga a daytoy ket “fit” wenno kabaelan na ti makipaset iti pre-trial proceedings.
Iti desisyon a naiparuk-at idi kalman, Biyernes, Pebrero 13, inbatad ti chamber a ti argumento ti depensa, a mabalin a kumaro ti sitwasyon ti dati a presidente kabayatan ti pannakaisayangkat ti trial ket patta-patta ken ispekulasyon laeng.
Inlawlawag pay ti International Criminal Court a ti immuna a desisyon idi Enero 26, 2026 mainaig iti kabaelan na a sumango iti pre-trial proceedings ket saan pay a pinal a pananghusgar iti kabaelan na a maipadalan a mismo iti trial.
Immunan nga inpetteng ti kampo ni Duterte a saan a nainkalintegan ti proseso ken maipagarop a naiwalin ti “objective facts” a panagkapsot ti memorya ti dati a presidente.
Nagballaag pay ti depensa a mabalin a maapektaran ti sibubukel a proseso no maituloy ti panagdengngeg iti confirmation of charges bayat a saan pay a naan-anay a nai-exercise ni Duterte dagiti karbengan na.
