LAOAG CITY – Pinatgan ti International Criminal Court (ICC) ti agpada a kiddaw manipod iti kampo ni dati a Presidente Rodrigo Duterte ken prosekusyon nga agnayun da pay kadagiti ebidensiya para iti confirmation of charges hearing iti sumaruno a lawas.
Iti desisyon a naiparuk-at, pinatgan ti Pre-Trial Chamber I ti maikadwa a kiddaw ti depensa nga agnayun ti “items” iti listaan ti ebidensiya da ken ti kiddaw ti prosekusyon nga agnayun ti 14 nga items iti list of evidence da.
Kinupirmaran ti prosekusyon a saanna a lapdan ti panagawat ti material a nakalista iti Annex A ti request ti depensa ken kiniddaw na iti Chamber nga awaten ti 14 nga items iti listaan ti ebidensiya, no sadinno nga inlawlawag na nga awan ti panangkontra daytoy iti biang ti depensa.
Inlawlawag met ti ICC Pre-Trial Chamber I nga adda ti umdas a rason tapno patgan dagiti kiddaw a saan a mangitunda ti undue prejudice wenno pannakadadael iti agsumbangir a partido.
Immunan a pinatgan ti Chamber ti kiddaw ti dati a presidente a saan a sumango iti confirmation of charges iti sumaruno a lawas.
