Inikkat ti prosecution ti International Criminal Court (ICC) ti maysa nga insidente manipod iti trial brief na kotra ken ni dati a Presidente Rodrigo Duterte, kalpasan ti pammilin ti Trial Chamber.
Iti updated trial brief nga inpila ti prosecution, inbatad na nga inikkat na ti amin a panangdeterminar iti maaw-awagan nga Incident 57 kalpasan nga inbilin ti korte nga ikkaten daytoy iti listaan dagiti insidente a naipalaon iti kaso.
Saan a naipublikar no ania a partikular nga insidente ti dakdakamaten kas Incident 57 gapu ta maipagarop a naglaon daytoy ti sensitibo nga impormasyon mainaig kadagiti testigo.
Sinukatan met ti prosecution ti “[DELETED]” dagiti dati a naestablisar iti nasao nga insidente tapno mapagtalinaed ti cross-references iti dokumento.
Inlawlawag ti prosecution nga awan ti inaramid a panagbalbaliw iti listaan dagiti testigo iti kaso.
Naikeddeng a marugyan intono Nobyembre 30 ti trial proceedings, kabayatan ti agtultuloy a panangtratar ti prosecution ken defense team kadagiti ebidensiya a maidatag iti panangusig ken ni Duterte.
