LAOAG CITY – Kiniddaw ti prosecution iti International Criminal Court (ICC) nga ibasura ti mosyon ti kampo ni dati a Presidente Rodrigo Duterte a limitaran iti 10,000 items laeng ti ebidensya nga ipublikar para iti kaso a crimes against humanity kontra kenkuana.
Segun iti prosecution, nainkalintegan ken adda ti direkta a pakainaigan iti kaso ti kaado ti ebidensya gapu ta napateg daytoy iti panangpaneknek kadagiti partikular nga insidente ken nalawlawa a konteksto ti maipagarop a krimen kontra kadagiti sibilyan, idinto a naglikudan na met dagiti alegasyon ti depensa a daytoy ket maysa a “dumping of documents.”
Iti immuna a mosyon ti depensa, inbutaktak na a immado ti evidence disclosure manipod iti 5,275 items iti confirmation phase, nagbalin a nasurok a 62,000 items, a pakairamanan ti nasurok a 320,000 a pinanid ti dokumento ken nasurok a 1,000 nga audio-visual materials.
Inlungalong ti kampo ni Duterte ti panangbukel ti baro a case record a saan a lumabes ngem 10,000 items tapno mapagtalinaed ti naikeddeng a Nobyembre 30 trial date, ngem inpetteng ti prosecution a ti pananglimitar iti daytoy ket mabalin a mangikkat kadagiti materyal nga ebidensya a napateg iti panangbiruk iti kinapudno.
