LAOAG CITY – Nangipeksa ti panagbalin a neutral ti International Criminal Court (ICC) Prosecution iti kiddaw ti kampo ni dati a Presidente Rodrigo Duterte nga idiskwalipikar ti tallo nga abugado ti drug war victims.
Inpakaammo daytoy ti prosekusion iti International Criminal Court Pre-Trial Chamber I iti babaen ti tallo a panid a dokumento a pinirmaan ni Deputy Prosecutor Mame Mandiaye Niang nga addaan ti petsa a Pebrero 16.
Nupay kasta, no bilang kasapulan daytoy a tulungan ti Chamber iti panangkonsiderar iti request ti depensa, kuna ti prosekusion a saan daytoy a nakadepende iti redacted document para iti confirmation of charges hearing.
Maipalagip nga idi Pebrero 11 idi nagkiddaw ti kampo ti dati a Presidente nga ibilin ti International Criminal Court Pre-Trial Chamber I iti International Criminal Court Registry a mawaswas ti bileg iti pannakadutok kadagiti tallo a legal representatives dagiti biktima ti war on drugs nga isuda Atty. Joel Butuyan, Atty. Gilbert Andres ken Atty. Nicolene Arcaina gapu iti maipagarup a conflict of interest.
Kiniddaw pay ti legal team ti dati a Presidente iti Chamber nga ibilin ti Registry nga isuspenso ti access dagiti abugado iti rekord ti kaso kabayatan a nakapenpen ti desision.
