LAOAG CITY – Pormalen a kiniddaw ni International Criminal Court (ICC) Prosecutor Chief Karim Khan iti Appeals Chamber nga ibasura ti kiddaw nga i-diskwalipika da daytoy manipod iti kaso ni dati a Presidente Rodrigo Duterte.
Iti submission na, inpetteng ni Khan nga agpapada nga espekulasyon laeng ken awan ti pagibasaran dagiti claim ti depensa kontra kenkuana a napaay a mangsurot kadagiti naikeddeng a legal threshold para iti diskwalipikasyon iti panangiggem iti kaso.
Inlawlawag ti International Criminal Court Prosecutor Chief a saan a nakompormiso iti panagbalin na a patas ti nagbalin a limitado a papel iti pormal a submission idi 2018 a maaw-awagan ti Article 15 communication, nga insumitir dagiti indibidwal, grupo wenno organisasyon a nagkiddaw iti Korte tapno imbestigaren dagiti maipagarop a krimen iti babaen ti war on drugs.
Nagtalinaed ti takder ni Khan a ti Article 15 communication ket naisumitir sakbay a rinugyan ti aniaman a pormal nga imbestigasyon isut gapuna a saan a maibilang a legal proceedings iti Rome Statute.
Inpetteng pay ni Khan nga awan ti overlap a napasamak iti nagbaetan ti apagbiit a panangibagi na kadagiti biktima idi 2018 ken ti nagbalin a reference iti arrest warrant application.
Kamaudianan na, pinagtibker ni Khan ti panangrespetar na ti otoridad ti Appeals Chamber ken kuna na a makabiruk ti reasonable a pagibasaran ti panagbalin a bias wenno saan a patas, ket agtungpal iti desisyon ti Chamber.
Iti agdama, awan pay ti inparuk-at ti International Criminal Court a ruling mainaig iti disqualification request ti defense team ni dati a Presidente Duterte.
Maipalagip a namonganay ti disqualification request ti depensa gapu iti maipagarop nga “irreconciliable conflict of interest” ni Khan gapu iti panangibagi na idi kadagiti biktima ti maipagarop nga extra-judicial killings iti Pilipinas ken ti simmaruno a papel na kas Chief International Criminal Court Prosecutor a nabilin a mangiyuswat tipatas ken awan kankanunungan na nga imbestigasyon iti kapada a pagannurutan ti panagpatay.
