LAOAG CITY – Inrakurak ni International Criminal Court (ICC) Assistant to Counsel Atty. Kristina Conti a natingitingen dagiti eksperto ti mental health ni dati a Presidente Rodrigo Duterte kalpasan a kiniddaw ti kampo daytoy a saanen nga ituloy ti imbestigasion gapu ta adun dagiti saanna a malagip.
Inbatadna a ti nangkita iti dati a Presidente ket dagiti psychologist wenno psychiatrist no sadinno a dimmalan daytoy ti CT Scan ken MRI.
Kunana a saan pay a kumbinsido ti International Criminal Court Pre-Trial Chamber ken adda dagiti saan nga umannugot iti kalikagum a mapasamak ti depensa.
Inlawlawagna a posible a mangala pay ti Pre-Trial Chamber kadagiti eksperto tapno kitaen ti kasasaad ni Duterte.
Innayonna a saan nga agbayag ti panangkonsultar ken ni Duterte gapu ta adun dagiti doktor iti nangkita kenkuana.
Kabayatanna, inpakaammo ni Conti a maul-ulawda gapu ta basar kadagiti rakurak dagiti eksperto ket nag-decline ti memory ni Duterte ngem saan a kayatna a saoen ket saanen a mabalin a sumango iti trial.
