LAOAG CITY – Natay ti maysa nga ice cream vendor kalpasan a nagbekkel iti uneg ti kuwarto na iti Brgy. 19 ditoy ciudad ti Laoag.
Ti biktima ket agtawen ti 29, awanan asawa, taga Masbate ngem agdama nga agnanaed iti nadakamat a barangay.
Iti imbestigasion ti Philippine National Police ditoy ciudad ti Laoag, nakita ti akinkukua ti pagtaengan nga agtawen ti 62 a nakasilaw paylaeng ti kwarto ti biktima isut gapuna a linukatan na ti ridaw.
Nupay kasta, nakigtot daytoy idi nakita na ti biktima a nakabitin babaen iti panagusar na ti tali ken awanen ti biagna.
Mainaig iti daytoy, inpakaammo ti katrabahuan ti biktima nga agtawen ti 37, pada na metlaeng nga ice cream vendor, nga agsagsagaba iti depresyon ti biktima kalpasan a maipagarup nasikugan na ti nobia na a menor de edad no sadinno a maipagarup nga inreklamo da ti kaso a rape (child abuse).
Inpasigurado met dagiti imbestigador iti Philippine National Police nga awan ti nakita da a foul play iti pannakatay ti biktima.
Kabayatanna, iti naiwayat a post mortem examination iti bangkay ti biktima babaen kenni Dr Rodrigo Catcatan ket naduktalan a natay daytoy gapu iti Asphyxia by Strangulation, ken nakurang nga uppat nga orasen a natay idi nakita daytoy.
