LAOAG CITY – Saan pay a mabalin nga usaren ti Intensive Care Unit (ICU) iti Laoag City General Hospital (LCGH) gapu ta saan pay a nakasagana dagiti serbisyo a maipaay kadagiti pasyente.
Segun ken ni Doc. Marsha Lou Wafan, mangidadaulo ti nasao nga ospital, posible a mausar ti Intensive Care Unit inton bulan ti Nobyembre ngem mausar pay laeng daytoy kas pagiyakaran kadagiti pasyente nga agkasapulan ti naan-anay a pannakataming, agraman dagiti mai-transfer iti Mariano Marcos Memorial Hospital and Medical Center iti ciudad ti Batac.
Ngem inpasigurado ni Wafan a temporaryo laeng daytoy.
Kabayatanna, naamuan nga agpapan ita ket agkurkurang pay laeng ti personnel iti nasao nga ospital.
Maipalagip nga immunan a narenovate ti Laoag City General Hospital sipud ta adda dagiti paset nga agtedted no agtudo.
