LAOAG CITY – Naiget a kontraen ni Father Arvin Mangrubang iti Iglesia Filipina Independiente iti ili ti Pasuquin ti operasyon ti cockpit arena iti semana santa.
Inpetteng na a ti semana santa ket saan laeng a maipapan iti hwebes santo ken biernes santo.
Inlawlawag na a ti holy week ket panawen a panangamiris ti panagsagaba, pannakatay ken panagungar ni Hesus Kristo.
Innayon na a ti semana santa ket adda ti kaipapanan na iti biag babaen ti pananglagip ti panangisalakan ti Diyos iti sangalubungan.
Inpalagip ni Father Mangrubang a ti pallot ket maysa a klase ti sugal a ti kangrunaan na a magun-gundawayan ket dagiti nakapuy ti kapanunutan na.
Kuna pay ti padi a ti pallot ket saan laeng a sugal no di ket maysa payen daytoy a bisyu.
Kabayatanna, inbatad ni Father Joey Ranjo, ti pannakangiwat iti Romano Katolika ditoy ciudad ti Laoag a no mabalin ket awan koma paylaeng ti maiyuswat a derby kabayatan ti semana santa.
Daytoy ti takder ti padi seknan iti agtultuloy latta nga operasyon ti cockpit arena ditoy ciudad ti Laoag.
Kuna na a saan nga agpapada ti pammati dagiti tattao mainaig pannakangilin ti nangina nga aldaw.
Nupay kasta, inpalgak ni Father Ranjo a masapol a respetaren ti pammati iti tunggal maysa.
Innayon na a mabalin a gapu ta saan a nairana a hwebes santo ken biernes santo ti derby gapu to naka-schedule daytoy iti Abril 3, Lunes Santo.
