LAOAG CITY – Kinumpirmaran ni Mayor Joseph De Lara iti pannakaipatungpal ti lockdown iti ili a Solsona gapu iti pangta ti coronavirus disease wenno COVID-19.
Daytoy ket tapno awan dagiti rumuar a residente malaksid laeng no adda ti emergency wenno mapan gumatang kadagiti kasapulan.
Inbatad ni De Lara a masapul a maysa laeng a miyembro ti kada pamilya iti mapalubosan a rumuar.
Kunana a no mabal-balin ket saan a rumuar dagiti ubbing ken nataengan agsipod ta narisgo dagitoy iti sakit.
Namunganay ti pannakipatungpal ti lockdown iti ili a Solsona iti laksid a COVID-19-free ti probinsya gapu ta adu dagiti agsangpet a kailyan ken tapno makontrol dagiti sumrek iti nasao nga ili.
Inlawlawag ni De Lara a dagiti rumuar iti Solsona ket maikkan dagitoy ti oras.
Inbatad na a dagiti mapan gumatang ti agas wenno makan ket masapul nga agturong pay laeng dagitoy iti Rural Health Unit ta mabalin met dagiti opisyal ti lokal a gobyerno iti mismo a mapan gumatang.
Innayon na a dagiti mapan iti banko ket masapul a mangipakita da ti proof of transaction nga adda iti perma ti bank officer iti oras ti transaksyon tapno mamonitor da a saan dagitoy nga agpas-pasyar.
Inbatad na a no agbayag daytoy ngem iti naituding nga oras ket maibilangen a person under monitoring.
Kabayatanna, malaksid kadagiti kameng ti PNP a naideploy iti checkpoint, nadeputize pay dagiti opisyal ti barangay ken dagiti permanente nga empleyado iti munisipiyo tapno mangmonitor kadagiti sumrek ken rumuar iti ili.
Inmandar ti Mayor iti pannakadisinfect dagiti pampubliko a pasdek iti mamindua a daras kangrunaan ti tiendaan.
Iti agdama, inbatad ti opisyal a 24/7 da nga agmonmonitor kadagiti pagserrekan ken pagruaran dagiti nagduduma a barangay.
