LAOAG CITY – Naiget ti panagsagana ti lokal a gobyerno ti ili a Badoc para kadagiti turista ken dagiti deboto ni Sta Maria, La Virgen Milagrosa de Badoc ita a Semana Santa ken summer.
Segun kenni Mr. Jade Raquel, tourism officer ti ili a Badoc, daytoy ti kangrunaan a tamtamingen ni Mayor Maximo Cajigal.
Kuna na nga isagana da pay dagiti pasilidad, suplay ken sabsabali pay a kasapulan para ti panagturong dagiti turista.
Malaksid iti panagsagana, inbatad ni Raquel a mairapin met ti panangasistir da kadagiti turista a mangbisbisita ti La Virgen Chapel, Badoc Island, ken sabsabali a napipintas a buya ti nasao nga ili.
Kabayatanna, naruay dagiti deboto a naggapu iti nagduduma paset ti probinsya ken iti sabali a probinsya ti bumisbisita iti La Virgen Milagrosa de Badoc ken manamnama ti pannakakorona na intono Mayo 31 ita a tawen.
Innayon ni Raquel a naiget ti koordinasyon da iti Philippine National Police (PNP) iti nasao nga ili ken addaan ti visibility tapno maipaayan ti seguridad dagiti sangaili.
