LAOAG CITY – Plano ti gobyerno municipal ti ili a Pasuquin nga ideklara nga adda iti “state of calamity” ti Bgy. Caruan ti nasao nga ili.
Segun ken ni Acting Mayor Pedro Rex Aguinaldo, aramiden da ti nasao nga addang gapu iti nakita da a sitwastyon dagiti bumarangay nga adda iti asideg ti baybay a napilitan da a nangtalaw dagiti balbalay da kalpasan a sinapsaplitan dagitoy ti dadakkel nga allon ti baybay kalpasan a nadadael ti “sea wall”.
Kuna na a mangiwayat da iti emergency session iti ko nseho tapno pagsasaritaan da ti nasao a banag.
Maipalagip nga agarup a 26 a pamilya ti kapilitan a naibakwit idi kalman ken naikabil da iti evacuation center gapu iti nasao a rason.
Mainaig iti daytoy, inpakaammo ni Acting Mayor Pedro Rex Aguinaldo ti ili a Pasuquin a malaksid ti Bgy. Caruan a nagkaproblema gapu ti nepnep ket uray pay ti Bgy. Pragata ket naaddaan ti problema dagiti bumarangay.
Segun ken ni Aguinaldo, ti dalan iti nasao a barangay ket marigatan nda a rumuar ken sumrek gapu iti nalotlot a situasyon na ken danumdanum.
Kuna na, a gapu iti daytoy ket maysa pay daytoy kadagiti kiaten da apaman a sumayaat ti panawen gapu ta iti agdama a tiempo nga agsardeng nga agtudo kalpasan ket gulpien na manen ti agtudo ket makaigawid para iti panankatarimaan dagiti kalsada a rumbeng a matarimaan a saan laeng nga iti Bgy. Pragata.
