LAOAG CITY – Inbatad ni Police Major Chris Anthony Sorsano, ti chief of police iti ili ti Solsona a possible a kadagiti sumarsaruno nga aldaw ket mapagbalin ton a green category manipod iti yellow category iti ili ti Solsona.
Kuna na a naladaw ti panangisumitir da kadagiti dokumento para iti panangirekomendar da iti pannakaiyakar iti green category iti ili ti Solsona.
Inlawlawag na pay a ti Commission on Elections ti nangikabil iti yellow category iti ili ti Solsona no sadinno nga inbasar da daytoy kadagiti napaspasamak kadagiti naglabas nga eleksyon.
Nupay kasta, inpasingked ni Sorsano a sipud nangrugi ti election period ket awan pay ti namonitor da nga aniaman nga insidente nga adda ti pakainaigan iti Midterm Elections.
Inpasigurado ti opisyal nga ar-aramiden da amin a kabaelan da tapno agtalinaed a natalged, naurnus ken awan dagiti saan a nasayaat a mapasamak agingga a malpas ti eleksyon.
