LAOAG CITY – Kinumpirmaran ni Police Senior Inspector Cheryl Guzman, Officer-in-Charge iti PNP iti ili ti Burgos ti pannakatiliw da ti maysa a lalaki a maipagarop nga illegal recruiter idiay Barangay Ablan ti nasao nga ili.
Inbatad ni Guzman a natiliw ni Ryan Balmores, agtawen iti 30, residente met laeng ti nasao a barangay babaen ti bileg ti maysa a warrant of arrest nga aggapo iti RTC Branch 19 iti Metro Manila.
Inlawlawag ni Guzman a nagrecruit ni Balmores kadagiti mapan agtrabaho idiay Oman idi pay 2017 ken nagbayad dagiti biktima iti saglilima ribo a pisos.
Nupay kasta, awan pulos ti nakapan idiay Oman kadagiti maseknan.
Segun ken ni Guzman, kaadoan a nagbalin a biktima ni Balmores ket taga Manila ken adda laeng ti tallo a taga Bacarra.
Inkalintegan ni Balmores a dagiti kwarta nga inbaybayad dagiti rinecruit na ket inderetso na amin ken ni Ruby Rose Beltran a taga Cavite City.
Naamoan a karaman pay a naisyuan ti warrant of arrest ni Beltran ngem agpapan ita ket saan pay a nabirukan dagiti otoridad.
